نوارة

ألفة بن سعد

ألفة بن سعد

بتاريخ نشرت
و أنا من أكثر الناس المزاجيين .. عاشڨة للتخرنين .. ما نحبش التكعرير ، ما نحبش الكلام الجارح و التزعبين .. مذبلة عينين..
أنا مالناس الضحاكة .. لي تحب الفرحة ، لي عندها برشا طاقة مدفونة لداخل ،لي تحب الناس لي بايعة الدنيا بلفتة و تضحك و تنصح و تواسي ..
أنا من أكثر الناس الحساسة ،، ما ننساش الكلمة لي تتقال في غير بلاصتها ، ما ننساش فلان لي جرح متعمد ،ما ننساش عبد أذاني .. نشد في قلبي  على أقل كلمة حركة خزرة و في نفس الوقت أنا إنسانة قوية ما تهدنيش الدنيا و لا ناسها ، كاتمة صوتي.. بكايا في جواجيا و ديما نوري فالجانب الباهي المنور لي فيا ..
أنا إنسانة مليانة عيوب ،مغيارة و بكاية و مزيانة و كي نحب عبد نمرجوا و نكرهوا في حياتو و يمكن أنانية خاطر حاجتي يا تكون ليا كهو يا ما تكونش .. و صريحة عاللخر ،كلامي يتقال في وجهك ،كلام الظهر ما تربيتش عليه ..
أنا هي أنا .. ما تبدلتش ..و ما حاولتش نبدل روحي بش نرضي حد .. مزلت نحب الليل و ريحة التراب و القهوة العربي و مزلت نلعب مع الصغار و نحب ريحة النوار ..مزلت مغرومة بالأحمر و نحب كل حاجة فيها غموض و ظلام .
أنا إنسانة مليانة تناقضات .. لكن فالنهاية إنسانة ..ما نطمحش للكمال بقدر ما نطمح بش نكون خير 💙
ألفة 🌷

التعليقات

يجب عليك تسجيل الدخول لتتمكن من إضافة تعليق