الأسقاط النجمي بين الخرافة والحقيقة

الأسقاط النجمي بين الخرافة والحقيقة

KaReEm HaNi

KaReEm HaNi

استمتاع يشعر بالاستمتاع ، بتاريخ نشرت

انا سعيد جدا اني بقيت جزء من المنصة العظيمة دي وحبيت اشارككم اول حكاياتي وهي الإسقاط النجمي وهل هو حقيقة فعلا ولا كذب ومجرد تأليف؟

من تلت سنين تقريبا سمعت عن شئ اسمه التنويم المغناطيسي وكنت وقتها في أولي اعدادي "12سنة"فحبيت أعرف ايه هو التنويم المغناطيسي وهل ده صحيح فعلا وموجود وفيه تسجيلات بتخلينا ننام مغناطيسي فعلا؟ قعدت ادور علي النت كتير وعرفت ان التنويم المغناطيسي ده موجود من ايام الحضارة الفرعونية القديمة وكمان بيساعد علي العلاج من امراض كتيرة جدا وفيه أطباء بيستخدموه في كدة فعلا.

مخبيش عليكم انا الأول كنت قلقان لكن فعلا بدأت ادور علي يوتيوب علي فيديوهات تنويم مغناطيسي وتسجيلات متخصصة في كدة فلقيت قناة واحد اسمه "يوسف التاجر" بصراحة انا كنت قلقان جدا من التسجيلات بتاعته لكن جربت واحد منها وهو "الجرأة" وبصراحة بجد حاجة فوق الخيال!

جسمي كان بيستجيب لكل كلمة بيقولها حرفيا وكانه بيتحكم فيا واخدني لذكرياتي القديمة وشوفتها قدام عيني بجد انا مش كذاب والله ده فعلا حصل معايا وحسيت ان جسمي تقيل بطريقة رهيبة زي مكون متبنج المهم قعدت اسمع الفيديو وبصراحة كان فيديو فعال جدا بجد وارتحت جدا ليه وقعدت اسمعه كتير والنتيجة كانت غير متوقعة بالنسبة لواحد مكنش بيصدق الحجات دي لكن النتيجة ان ثقتي في نفسي زادت جدا وبقيت شخص اجتماعي بزيادة وغير خجول بالمرة.

انصحكم تتابعوه

المهم ندخل في موضوعنا بعدها سمعت عن علم من علوم الطاقة اسمه الاسقاط النجمي وعرفت انه فرع من فروع الطاقة بيسميه العلماء بتجربة الخروج من الجسد وفكرته كلها بتقوم علي انك بترخي جسمك بالكامل وبتخليه يسترخي جدا وتفكيرك يكون صافي جدا وده طبعا مش هتعرف تعمله الا بتمرينات اليوجا والتأمل وبعديها هتحس ان جسمك تقل جدا وهتمر بمراحل وهي

  1. مرحلة شلل النوم:-تحس ان جسمك اتخدر خالص وانك مش قادر تحركه زي متكون متبنج.
  2. مرحلة الاصوات:وهي مرحلة مرعبة نوعا ما وهي في مجملها بتسمع اصوات غريبة مش موجودة اصلا زي اصوات قطط او خشب او حتي بكاء طفل وتفسير الحالة دي هي ان عقلك الباطن بيحاول يعرف انت صاحي ولا نايم فبيصدر بعض الاصوات عشان يتاكد بنفسه"وده بيدل علي اعجاز ربنا وقدرته سبحانه وتعالي"
  3. مرحلة عمل مراكز الطاقة وضربات القلب السريعة:هتحس ان فيه ضربات قوية جدا صادرة من قلبك هي في الحقيقة مش من قلبك لكنها من مراكز الطاقة الموجودة في قلبك.
  4. الطيران:هتحس انك خلاص بتبعد عن الاصوات دي وهتحس انك ريشة بيحركها الهوا ركز في الظلام شوية هتلاقي نفسك شايف اوضتك بالكامل! ولو بصيت وراك هتلاقي نفسك نايم!!  

انا مش بخرف والله ده اللي الناس بتقوله انا طبعا لاني كنت 12 سنة خفت وبعدت عن الموضوع ده لكن السنة اللي فاتت وانا في تالتة اعدادي 14 سنة تقريبا روحت فتحت فيديو تامل لعمل الاسقاط النجمي وكل ما عليك انك تسمع الموسيقي وتنام وهتمر بالمراحل اللي قولت عليها بصراحة انا جربت لكن وصلت لمرحلة شلل النوم وكنت لسة هدخل في مرحلة الاصوات بس خوفت اوي وقمت    

بس فعلا انا بجد نفسي اجربه ولو حتي مرة لان فعلا ده فيه ناس بتقول انه فعلا حقيقة وموجود من القرون اللي فاتت اما بالنسبة عن حكم الدين فيه فهو تقريبا حرام لو استخدمته وحش وحلال لو استخدمته حلو بمعني انك لو استخدمته مثلا عشان تشوف او تتجسس علي حد فده حرام اما لو عملته بغرض التجربة فده حلال .

الاسقاط النجمي بيخليك تروح اي مكان انت عاوزه بمجرد انك تفكر فيه فمثلا انت دلوقتي عملته وبقيت في البعد النجمي خلاص ودخلت المطبخ لقيت اخوك وابوك بيشربوا قهوة وبيتكلموا وصحيت وروحت سألتهم هيقولولك فعلا انهم كانوا بيعملوا كدة.

اما بالنسبة ازاي ترجع فانت بمجرد التفكير في الرجوع  هتلاقي نفسك تلقائي بترجع لجسمك فعلا طب مثلا افرض حد من اهلي افتكر اني انا مت مثلا! 

احب اقولك ان ده مستحيل يحصل لان مثلا لو ابوك لمسك وانت عامل الاسقاط النجمي وهزك او حتي لمسك لمسة كدة هتلاقي نفسك صحيت علي طول!

انا بجد كنت مستغرب جدا جدا جدا يعني بجد انا مش فاهم ده حقيقة ولا ايه ؟ ممكن تشاركوني بارائكم عن الموضوع ده ولو حد مر بنفس المراحل اللي ذكرتها يمكن نعرف نوصل لحاجة عن الموضوع ده دمتم بخير وبصحة .

واسف علي الاطالة.

التعليقات

  • Yousuf Altajer

    شكراً عزيزي .. انا يوسف التاجر .. اتمنى انك تعمل التوكيدات فانها مفيده جداً
    اما عن الحلال و الحرام كان رسول الله (ص) كان يختلي و يتامل
    و في سورة النجم قال تعالى
    بِسْمِ اللَّهِ الرَّحْمَنِ الرَّحِيمِ
    فَأَوْحَى إِلَى عَبْدِهِ مَا أَوْحَى (10) مَا كَذَبَ الْفُؤَادُ مَا رَأَى (11) أَفَتُمَارُونَهُ عَلَى مَا يَرَى(12)
    ما كذب الفؤاد ما رأى و ليس العين ما رأت .. و المقصد هنا ان الوحي رآه النبي (ص) من فؤاده و ليس عينه

    الوحي مستمر كما اوحى الله للنحل
    حى مستمر-لا نتوقع من اللة ان يهملنا او يتركنا بدون رحمة منة
    من القرآن الكريم
    لا يغلق باب الوحي القرآن الكريم والتنزيل !!
    ” قل لو كان في الأرض ملائكة يمشون مطمئنين لنزلنا عليهم من السماء ملكا رسولا ”
    سورة الاسراء (95/ 17
    و لكن الرساله انتهت و لكن الوحي الاهي لن و لم ينتهي
    و الاسقاط النجمي يمكنه ان يدلك الى هدف اعلى في حياتك الروحيه و العقليه
    كما في علم الاستخاره .. يستخير الانسان فيراه في حلم او احساس
    هل هذا معقول
    و تذكر دائماً انما الاعمال بالنيات

    شكرا من جديد صديقي
    1
  • Unbekannt

    كله خزعبلات يا صديقي
    0

يجب عليك تسجيل الدخول لتتمكن من إضافة تعليق