Khaled abou alwaleed

Khaled abou alwaleed

بتاريخ نشرت

يبدو أني في الطريق لزواج تقليدي، اشعر بالتوتر وعدم الارتياح لخوض تجربه كهذه

التعليقات

  • Maryam | مريم

    لدي نقطة واحدة سأعلق عنها فقط.
    الزواج قسمة ونصيب، بعيدا عن أي شخص يعمم ويقول
    حب وزواج غير ناجح، زواج تقليدي ناجح، زواج بحب ناجح، زواج تقليدي غير ناجح
    كل الإحتمالات ممكنة، الموضوع هو توفيق من الله والمسألة معتمدة على الطرفين وفقط، بدون تعميم رجاءً
    الفرق بين الزواج التقليدي والحب هو أن زواج الحب، طعمه ألذ، ذكريات أجمل، توافق أكثر، بيئة أفضل، توافق وثقة أمتن وأفضل، الرضا.تشارك اهداف واحلام وطموح،هذا في حال نجاحه طبعا. وانا شهدت قصصا لو كتبتها في أسطر روايات لأنكرها العالم من جمالها. وفي نفس الوقت شهدت زواج تقليدي نمى الحب بين الطرفين بفترة الخطوبة وعاشا أياما جميلة وتعارفا، ربما كان هنالك بعض العوائق في البداية لكن بالنهاية عشق كل منهما الآخر...
    والعكس صحيح، بإختصار شديد يا عزيزي الموضوع هو توفيق من الله ويعتمد على شخصيتك وتعاملك وتأقلمك للظروف وفقط، وفوقها أتمنى أن لا تعمم بالمجتمعات العربية كلها قضية الأهالي المنغلقة لأنه ليس الجميع، فمثلا في منطقتي توجد 123 ألف شكل ونوع من الأهالي ومتنوعين .. وأنت لاتعلم قد تكون بينكم فتاة مثقفة علمها واسع وناضجة :) .لكن لا أعلم إحتمالية أن تحرزها

    بالنهاية أتمنى أن يوفقك الله وأن تستخير وتتمهل وأن يرزقك الله أجمل وأكثر فتاة مثقفة :)
    1
    • Khaled abou alwaleed

      شكرا مريم، معك حق الامر كله توفيق من الله ونصيب
      0
      • Maryam | مريم

        هل أنت بخير ! ؟
        1
        • Khaled abou alwaleed

          نعم الحمد لله، كيف حالك
          0
          • Maryam | مريم

            لا أعلم لِمَ لكنني شعرت لوهلة وكأنك تلقيت صفعة قوية للتو، على العموم أتمنى لك كل الخير
            الحمدلله في أفضل حال، وكيف لا أكون في أفضل حال وأنا أتنفس وأستطيع أن أرقص وأقرأ وأشاهد وأتأمل إحدى أجمل الأوطان، الحمدلله بخير :) ولو بالرغم من أنني أطالب بإجازة فورية الآن
            0
  • محب روفائيل

    ياااه يومية قصيرة جدا رغم كثافتها، وردود طويلة وكثيرة جدا لكنها جميعها مفيدة جدا، فشكرا لكم يا @Ruba و @riadhfe لكن دعني ألا أكتفي بالدعاء لك في أن يوفقك الله في إيجاد زوجة مناسبة، وأن أقول لك كلمتين في السريع.

    يبدو أن مثل البطيخة موجود في كل المجتمعات العربية وهو صحيح على البطيخة فقط، أما العروسة فاﻷمر لابد وأن يكون مختلف لضمان المستقبل، ﻷن العروسة وحياتك معها تختلف جذريا عن البطيخة وحياتك معها، فهذه ستكون عشرة عمر أما تلك فستكون عشرة عشر دقائق!

    لابد وأن تصل الخطوبة لسنة، وأن تفهم خطيبتك أكبر فهم ممكن، ولابد من رؤيتها والتحدث معها ومراقبة ملامحها وانفعالاتها على كافة الأشياء، ليس لدراستها ورؤية إمكانية الإقتران منها فحسب لكن لمعرفة كيفية التعامل معها جيدا فيما بعد.

    إن أردت الإجابة عن أي إستفسار آخر، وإن كانت الأخت ربى قد تعبت، فيسعدني الرد عليك، مع إني أظن أني لست خبيرا مثلها ومثل الأخ العزيز رياض.. الله معك
    0
    • ربى

      مش مشكلة كل رد على خالد ب10$ خليه يكمل كلام.
      0
    • ربى

      بالمناسبة كنت سأذكرك يا @moheb_rofail و @younes باعتبار أن وجهات النظر المختلفة قد تساعد خالد في التفكير.
      30$ and counting
      0
    • Khaled abou alwaleed

      سيكون من الصعب حصول فترات خطوبة طويلة وتعارف في مجتمعاتنا إن كانت بالطريقة التقليدية، اما بطريقة الحب والبحث عن شريك مناسب فيكون فترة تعارف بدون خطبة وبدون تخطيط مسبق للإرتباط فإن وُجِد الحب فسيكون ذلك نتاج تفاهم واتفاق وهذا ما نبحث عنه
      على طريقة خمسات سأقوم بشراء الاستفسارات من افضل سعر هههه
      0
    • خالد نور

      حتى على البطيخة ما يسري. قبل سنوات كان هناك محصول هائل من البطيخ في السوق وطبعا فيه الفاسد.. كان هناك اختبار بسيط لتمييز الصالح وهو صفع البطيخة/ضربها. الناضجة تسمع لها صوت لأنه ينتج في وسطها بعض الفراغات، والفاسدة صامتة كالحجر.

      طريقة أخرى شائعة كانت بإقتطاع جزء على شكل "هرم" مربع بالسكين كعينة حية كضمان للجودة💯
      ((أفتقد هذه الأيام🍉))
      0
  • ربى

    لماذا تقول هذا، هل هو مجرد إحساس أم فعلا تسلك هذا الطريق؟
    بالمناسبة الزواج التقليدي ليس سيئاً كما أشعر من كلامك.
    2
    • Khaled abou alwaleed

      يبدو أني اسير باتجاهه، لا أعلم إن كان سيء أم لا، ولكني كنت اطمح أن اجد شريكة تفهم عقلي واطمئن أني سأستطيع التعامل مع عقليتها، لكن ربما الظروف تجبرني على سلك هذا الطريق، ما عندي شهادة ولا مليونير 😃 يا فاشل يا فاشل
      2
      • ربى

        ليش مفكر الشهادة بتخلي الواحد مبسوط أو المصأري؟
        كنا عمنحكي بلعيلة قبل فترة بخصوص هالشي خصوصاً بالنسبة للشباب الدكتور أو المهندس الي مرتاح ماديا كيف بصلو للنهاية لحالة مقرفة من شوفة الحال وكانه مفكر حاله ممكن يشتري بشهادته بنت عذوقه طبعا عم احكي من واقع مشاهداتي لزيجات ما توفقت ابدا بنفس المواصفات هاي..
        إذا مفكر انه الشهادة اول المال يمكن يخلوا بنت معينة تنجذب الك فواضح انك عم تحاول تجذب الشخص الغلط واذا كانوا أهل البنت هم الي رافضين عشان نفس الأسباب فبرضو انت عم تحاول تجذب الشخص الغلط. شو بدك تبدى حياتك مع شخص شخصيته ضعيفة ومحكوم؟
        عادي لو أتاخرت كم سنة لترتاح بقرارك..يم حبكت هلق صرت بدك تتجوز شاورلي بجيبلك ميت بنت دابحين حالهم يتجوزو بس ما بظن رح تتفاهم مع شخصيات مش ناضجة ومدلوقة بعد أول سنة بختلف كل هالحكي وبروح الحماس..اصبرلك كم سنة شو باااك
        3
        • Khaled abou alwaleed

          انا مقتنع بوضعي وبشخصيتي وحالتي بدون شهادات وبعرف اني لو تجوزت ما رح خليها تندم لأني الحمد لله عندي إطلاع وخبرة بالحياة تنفع زواجنا اكثر من الشهادات والمصاري، لكن غالباً اذا رح تتزوج بنت تحبها وعاجبتك وخصوصي اذا كانت متعلمة ومعها شهادات قد الحيط وهي موافقة أهلها ما رح يوافقوا وما بعرف اذا هالشي بيدل على ضعف بشخصيتها لأن هذا مجتمعنا واغلب البنات محكومين، كمان في عادات وتقاليد لكل منطقة صعبت الامور وكوني ابن ريف كمان صعبها اكتر، لهيك صابني يأس وإحباط وفكرت اتزوج وحدة من الريف على ذوق اهلي طبعاً، ترضى بالقليل لكن بسبب ظروف الحرب وبسبب العادات اغلبهم مش متعلمين وهون عندي تخوف كبير من أنو يصير فجوات وصعوبة بالتفاهم، كمان عندي عقدة من جيل الالفين لهيك بدي وحدة من جيل التسعينات على الاقل،
          مو قصة حبكت بس حسيت أني طولت خصوصي أنو كل رفقاتي عندهم اولاد وخايف اكبر اكثر فيصير صعوبة بالتفاهم مع الاولاد بسبب تباعد الاجيال، ما عندك ولا وحدة من المية واعية تقبل تاخدني بوضعي التعبان هههه، لازم تشتغلي خطابة
          بصراحة عندي تخوف أني اقتل احلامي بالمسؤوليات اللي رح تلحقني من هالشغلة ومن جهة تانية بيفضى الجزء المحجوز بدماغي للتفكير بالزواج والاستقرار.
          المهم بلا ما تشتري كمان جمعيهن حق تكت بدي اعزمك عالعرس مع اني ما مفكر اعمل عرس 😀
          عفكرة من شهر ما كان فيني شي وقايم الفكرة من بالي بس في ناس وسوسولي لدخلت الفكرة براسي
          قولتك اتركها ليجي وقتا لحالا بتزبط!
          3
          • ربى

            هلق شوف، في اشي انتو الشباب ما بتعرفوا، ما بتعرفو تطلبو، لأ عنجد في كتير ناس بحزن عليهم من هالشغلة..
            طيب بتقول البنت يمكن أهلها حاكمينها عشان هيك رح يرفضوك؟ طيب، عفكرة في رفض رفض، وفي رفض دلع من جانب البنت، و في رفض عشان بدهم شوية إقناع، بظن إنك من الناس الكتار الي إذا انحكالهم لأ هلص بغض النظر..
            هلق على فرض شفت بنت وعجبتك أخلاقها وتقدمتلها وحكولك الجماعة لا، ما تتضايق، بتعرف كم ميت حد بعرفو انرفضوا من أول مرة و بعدها تزوجوا وحياتهم تمام؟ على فرض السيناريو هاد صار، بتاخد وقت صغير و بترجع بتحاكي الأهل، إنه ليش لأ، فسروا السبب، وعلى حسب السبب بتتصرف، مرات البنت بتكون شوي مونونة ما بعرف كيف أشرحلك هالكلمة، بس بتكون من نوع كل شوي بعقل وبدها شوية توجيه وكتير أمور تانية, وبعد هيك بتقدر ترجع تتقدم بعد أكم شهر عادي جدًا، بعرف في ناس بعز عليهم بعض الرفض، بس لازم تفهم عقل البنت يدور حول الزواج و القرار مصيري، فمش من أولها أمورك تتسهل..والإشي كمان بالنسبة للشب، ولكن البنت حياتها تعتمد بشكل أكبر على هذا القرار، وكمية الخسارة والمشاكل في حال ما مشت الأمور تمام بتكون أصعب عليها من الشب.
            هلق هون إنتا بتقول إنه ممكن ترتفض على أساس إنك من الريف، بس مش فاهمة وين المشكلة؟ الي برفضك على هالأساس الله معو طريقو مسهلة شو بدك تناسب حد عنصري؟ والي بقولك شهادات و هيك بيكون قصدو قدي إنتا حضرتك شلش و شغيل وبتعرف تطلع قوت يومك..والأغلب إنه الأهالي بقبلو لما يشوفو الشب قد حاله حتى لو ما معه شهادة أو متعلم..
            كمان شغلة أنا أظن فهمتها إنه أهلك إلي هم عم يخطبولك؟ وهوون بقولك wrong again صحيح ممكن ما بتعرف بنات شخصيا بس انت بتشتغل مع ناس كتير، إذا معني، فكر بالناس المحترمة الي بتعجبك شخصياتهم، على الأغلب بناتهم متطبعين بطباعهم، ما في هي حرج تحكي مع شخص إنك راغب ترتبط إذا عنده بنت في جيل الارتباط..وهادا من أحسن الأساليب على فكرة لما تكون مخالط حد وبتعرفو منيح أحسن من حد ما بتعرفوا من مرة.
            كماااان شغلة، اسمع نا بهمني أعرف عمرك، بس ما تربط الجيزة بعمر معين، ولك إنتا شب بمجتمع عربي يعني لو صرت 45 ما في مشكلة، وكمان شغلة ما تحط بعقلك عقدة بدي بنت صغيرة ..شو هاي جيل الألفين إنتا عم تحكي على حد بحدود 19 سنة -22 سنة ..وسعلي أفقك شوي، عفكرة الي بغفلو مجتمعنا الغبي إنه البنت الأكبر إلي الها اشتغلت و انعكت أقدر على تحمل مسؤولية الزواج من بنت بوبو لساها مش فاهمة وين الله حاططتها, بس بفضلو الجاهلات لإنه أسهل يتحكمو فيهن.نقطة.
            شغلة الارتباط بدها وقت، فخذ وقتك مش يلا يلا يلا يلا, قبل شهر كنت محلاك هلق يم..تمهل عادي جدًا..
            وإذا بدك أي شي أجاوبك عليه من وجهة نظر البنات تمام اسأل بس كل سؤال صار بمصاري هلق، من وين تلاقو حد صريح قدي، كنت بضيعو بلاي :]
            5
            • رياض فالحي

              في مسألة الرفض ,شكرا للإنارة عقلي على مسألة معاودة السوال مرة أخرى حول سبب الرفض و معاودة المحاولة,الحقيقة في الحياة الواقعية تعرضت للرفض عدة مرات و من اول مرة لا أعاود المحاولة.
              4
            • Khaled abou alwaleed

              لكن الطلب بعد الرفض مافيه كسر نفس وتلزيق عالجماعة قولتك، بالعكس أنا قلت عالاقل من جيل التسعينات يعني عمرها عالاقل ٢٠ سنة مع أني بفضلها أكبر، وكنت مزبط وضعي وناوي ع بنت اكبر مني في بيننا علاقة جميلة لكن صعب انقبل بشروطهن وعاداتهن لهيك ما عندي جرأة اتقدم
              مافي مشكلة أني اتأخر صحيح، وأنا هيك مفكر كمان وعلى قد ما شفت عالم تبهدلت كنت مخطط الاقي شغل ثابت ولو اني بفضل يكون شغل خاص فيني اضمن فيه جزء من مستقبلي واحتياجاتي اللي رح تكبر، وزبطلي بيت يلمني وهيك بدون ما ارمي حالي بمصير مجهول
              سؤال لاحق الدفع:
              اغلب البنات بيحبو يتزوجو عن حب وكمان حتى لو عايشين قصة حب بس يجي عريس جاهز تلاقيهم تركو كلشي ووافقوا، ليش ممكن تصير هالحالة هل هي عدم ثقة بالشباب أو لترتاح وتأمن حالها على بكير
              لأن بزمننا كثرت علاقات الحب واذا ما اخذت حبيبتك رح تاخذ حبيبة غيرك غالباً وهالشي بخاف يعملي مشاكل مثل أنها تندم وهيك
              @riadhfe اخذ جواب مفيد هههه حاسبيه، بلاكي بنضيع، بس مو على حظنا تصحي وتروحي تعطي استشارات بخمسات 😂
              2
              • ربى

                >ناوي ع بنت اكبر مني في بيننا علاقة جميلة لكن صعب انقبل بشروطهن وعاداتهن لهيك ما عندي جرأة اتقدم
                شوف كللكو زي بعض..بتاخدو الجواب قبل السؤال، يا أخي ابلع كبريائك وتشجع وتقدم!
                عنجد لازم تدفعلي مصاري علة ردودي، يا إما تجيبلي تلفون بدل الي عم يحتضر تبعي..
                شوف، قبل فترة كنت بحكي مع صديقة الي، من عيلة غنية جدًا، وأهلها دكاترة بالجامعة و هي بنت جميلة جدًا..فتحت معاي سيرة الزيجة، بتعرف شو بتقولي، ما في حد محرز عم يتقدملها، عارف شو قصدها؟ صح كان ناس بس يكونو نفس طبقتها الاجتماعية، ويكونو سقعين مايعين أمو أوبو مدربينلو شغلو وهيك، حد غير هيك ما كان يسترجي يقرب، عشان متلك كان يفترض الجواب والرفض، وهي كانت بدها حد قد حاله، مش مايع، وهالقد حاله هادا خايف يرتفض، وفي غيرها كتير صديقات إلي نفس الكلام، بفترضو إنه آن أنا ما رح يعبروني إلخ، صحيح الأهل ممكن يرفضوا أحيانا باعتبار الفروقات بس ما تضلك تفترض إنه البنت رأيها صفر بالموضوع، أغلب الأهالي هالأيام بدهم سعادة أولادهم أو بناتهم.
                ------------
                اغلب البنات بيحبو يتزوجو عن حب وكمان حتى لو عايشين قصة حب بس يجي عريس جاهز تلاقيهم تركو كلشي ووافقوا، ليش ممكن تصير هالحالة هل هي عدم ثقة بالشباب أو لترتاح وتأمن حالها على بكير
                ....لا الأغلب عم يدور على -سند- هدول الي بتحكي عنهم في حال انت عم بتدور على وحدة مراهقة بدها تعيش فيلم تركي، بلا حب بلا بطيخ بلا هبل، الي عم تطلبو بيجي مع الوقت، صح التقبل مهم، بس هو أساس الحب الي بيجي بعدين وبكبر مع الوقت، الأساس الصح التفاهم والتقبل، مش الرومنسية.
                وسؤالك الأخير برضه هادا جوابه لإنه البنت بالنهاية بتتوصل لإنها بدها حد يسندها مش بس يدللها، في ناس بتدلل بس مش خرج مسؤولية هدول جماعة ما بيلزمو ولا خرج جيزة.
                3
                • Khaled abou alwaleed

                  عنجد شكلو لازمها شوية شجاعة، قررت راجع نفسي واتمهل شوي بلكي اقدر اخد قرار كون متطمن ومرتاح معو،
                  تكرمي احلى تلفون بس استني لتنحل مشكلة هواوي مع امريكا لنعرف نجيب هههه
                  مالنا مختلفين عالبنات ورغباتهن لكن الاهل وعقلياتهم ما بعرف كيف، بحس هالمشكلة ازلية وبشك انو نكون مثل الاهالي الموجودين هلأ بس نكبر، لأن اغلبهم عانوا من هالمسائل بزمانهم ورجعوا يطبقوه وكأنو انتقام
                  المهم عيدك مبارك وينعاد عليكي بالصحة والعافية والعيد الجاي نشوفك عازفة قد الدنيا، بعتقد عندكم عيد بكرا كمان الا بسوريا اجلوها للأربعاء والنهفة بقى الضيعة اللي فيها اهلي تحت سيطرة الحر المدعوم من تركيا واعلنوها عيد بكرا والضيعة اللي جنبنا وتبعد ١ كيلو تابعين للاكراد أو قسد وعيدهم مع النظام لبعد بكرا شوفي لوين وصلت المهزلة بقى
                  3
                  • ربى

                    عنا لسا رمضااااااااان!
                    ..كيفو شايومي؟ حسب ما شفت الجهاز ابدا مش عاطل وسعرو مناسب..الجهاز تبعي انهبل رسمي وبشتغل لحاله وبحكي لحاله..تخيل طلابي حاملين أجهزة أحدث من جهازي..المشكلة انا يضل معي الجهاز لحد ما يهتري تماما..ما حد عم يقبل يصلحلي اياه تخيييل..قال قديم وما بسوى..نوعه جالاكسي neo 3 قدي يعني قديم؟
                    المهم الله يوفقك فيما اخترت ويسهل أمورك
                    2
                    • Khaled abou alwaleed

                      عجيب حتى بلاد الشام انقسمت نصين لبنان والاردن لحال وسوريا وفلسطين
                      هههه حلو الشايومي ما بيشكي من شي،لاحظتي اذا شلنا النص الأول بيضل يومي شا-يومي, مشي حالك بيومي لبين ما جبلك الشا
                      بمناسبة اني خلصت دورة تصليح تعي خليني اتعلم فيه هههه، ما بتكبر عالنعمة انا المهم جهاز نتعلم فيه وننزعو
                      لم امر بحظارة بداية السامسونج صبرت على نوكيا حتى انتقلت لسامسونج اس 2.
                      ليش 10$ عالسؤال لو رضيانين بخمسات اهون بعدين انا زبون وباخد كميات لازم تعمليلي سعر خاص لتكسبيني 😌
                      الله يسعدك وييسر امرك
                      1
  • رياض فالحي

    بالتوفيق,اليوم كنت في مشوار ركبت المترو ,طيلة الطريق كنت افكر في موضوع "كيف تختار شريكة جياتك المناسبة" كنت اطرح الأفكار بيني و بين نفسي و أجيب على تساؤلاتي , على العموم الزواج كما اقول دائما مثل شرائك للبطيخ من السوق فحين تفتح البطيخة قد تجدها حمراء من الداخل و تهنأ بها و قد تجدها خضراء و غير ناضجة , هذا التشبيه مجازي ,فأحيانا تحب فتاة ثم بعد الزواج يذهب ذلك الحب أدراج الريح لذلك لا يوجد فرق كبير بين الزواج التقليدي و الزواج عن جب فقط هناك تفاهمات يجب على الزوج و الزوجة أن يتفقا حولها و أن يكونا يقدران العيش المشترك تحت سقف واحد ,البيئة التي أتيت منها أغلب الزيجات تقليدية بحتة و الحمد لله الجميع بخير و نسبة الطلاق عندنا قريبة من الصفر ,المهم أن تحسن الإختيار أو يحسن اهل العروس إختيارك فأنا أقول إخطب لبنتك قبل أن تخطب لإبنك ,طبعا هناك فترة خطوبة أو تعارف عليك أن لا تستغني عنها حتى تتفق أنت و خطيبتك كذلك هناك عدة تفاهمات عليكم أن تتفقوا عليها حتى يكون زواجا ناجحا .
    أتنمى لك السعادة و الحظ الطيب .
    2
    • Khaled abou alwaleed

      شكرا، خففت عني بعض الالم من سلبية الموضوع وأنه يمكن أن يكون خيراً مما نخطط له لسنين،
      لكن هل نستطيع في فترة الخطوبة التخلص من التصنع والبقاء على طبيعتنا مثل الازواج حيث تكون العلاقة عفوية اكثر لذلك سيبقى هناك اشياء مخفية وجزئيات ربما لن نتطرق إليها حتى نعايشها بعد الزواج وكما ذكرت إما ان تكون البطيخة حمراء او قرعة كما يقولون، ادعو الله أن يرزقني الزوجة الصالحة وإياك إن شاء الله.
      2
      • رياض فالحي

        آمين,بصراحة نحن نؤجل الزواج لسن أكبر يعني في أواخر العشرينات أو بدايات الثلاثينات ,لكن لكل مجتمع خصوصياته.
        أنا كذلك من الريف كما حصلت على شهادتي الجامعية الأولى بعد لفة طويلة في هذه الحياة لذلك مسألة لاشهادة الجامعية لا تفكر فيها كثيرا
        بالنسبة لتفكيرك في فارق السن بينك كأب مستقبلا و إبنك الأبناء رزق من الله و برك بهم من خلال حسن تربيتهم سيجعلهم مطيعين لكن ليس سببا لتعجيل الزواج.
        2
        • Khaled abou alwaleed

          اكملت عمر ٢٧ وأظنني مقبل على اواخر العشرينات لذلك بدأت تأتيني هذه الافكار بالإضافة لكلام اسمعه باستمرار من الاهل يدفعني لذلك بسبب زواج كل اخوتي حتى الاصغر مني، لكني أعيد التفكير الان فلا زال لدي متسع من الوقت ومثل هذا الامر لا يتم بدون استعداد ودراسة لأنه قرار مصيري نوعا ما
          1
          • Maryam | مريم

            لا أقترح عليك أن تضيع جمال العشرينات، لكنني بنفس الوقت لا أدفعك للتسرع، كل ما في الأمر أنها فترة ذهبية "قد" تضيع
            0

يجب عليك تسجيل الدخول لتتمكن من إضافة تعليق