النوة مخلصتش النوة حتخلص بكرة

A kadry

A kadry

بتاريخ نشرت

انا من هواة صيد السمك افتكر مرة اعتقد كنت في ثانوي وقابلت واحد صاحبي وقولتلوه اعمل حسابك بكرة اخر  يوم  في النوة ( المعتقد عندنا ان بعد النوة الصيد بيكون كويس جدا ) واتفقنا على التفاصيل .

تاني يوم اتحركنا قبل الفجر واخدنا البوص وعدة الصيد والطعم واي حاجة ممكن نحتاجها لليوم حددنا مكان الجلسة  وكان الموقع في الشاطبي امام مكتبة الاسكندرية قبل ما تفتح طبعا المنطقة كانت فضية جدا واقرب حاجة لينا هو مجمع الكليات .

طبعا احنا كنا في الشتاء وما ادراك ما الشتاء في اسكندرية ولك ان تتخيل بقى وانت على البحر .

سميت وطعمت السنارة و رميت واستنيت بقى كأي حد بيصطاد  انا كنت حاسس بس بكدب نفسي البحر عالي هوب موجه جت وضربت في البلوك الاسمنتي وارتفعت ونزلت علينا بدون منطق طبعا كانت اول حماية ومش الاخيرة .شويتين والهوا اشتغل اعتقد من شدة الريح كنت حاسس ان الكلام بيطلع مني لزميلي مبيلحقش يسمعه كان بيطير مع الهوا واللي زاد يا حضرات ان المطر اشتغل قولنا ماشي شوية والجو يروق وقولت نتحمل في سبيل الصيد اللي حنحصل عليه وكل شوية صاحبي يقولي ايه يا عم اقوله اتقل دي سمكة بعد النوة دي ملهاش حل .المطر بيزيد وبدانا نرتعش من البرد والبلل والموج اللي كل شوية يغطينا فما كان مننا الا اننا قولنا نستنى شوية لحد ما الجو يهدى بس عايزين نتدفى صاحبي طلع في المنطقة الفاضية دي يدور على اي حاجة نولع فيها نار وبعد يمكن نص ساعه جه و جايب معاه كيس قمامة ايوه وبيحلف ان هو دا اللي لقاه ولعنا فيه وطبعا جسمنا سخن شوية فنمنا قومنا حوالي الساعه 7 وراجل كبير نده علينا قالنا حد يصتاد دلوقتي قولتلوه مهي النوة خلصت قالي النوة مخلصتش النوة حتخلص بكرة .

طبعا لملمنا حاجتنا وانا مش قادر اتكلم وروحنا وبدل ما نجيب معانا سمك كل واحد اخدله نزلة برد نيمتنا في البيت اسبوع ....

التعليقات

يجب عليك تسجيل الدخول لتتمكن من إضافة تعليق