علمي ولا ادبي

A kadry

A kadry

بتاريخ نشرت

انا من النوع اللي شكله لا يوحي بسنه .

كنت في الكلية اعتقد فرقة السادسة وكنت في مشوار اخدت تاكسي وكان السائق كبير في السن فضل يبصلي ويبص للطريق استغربت وانا من النوعية اللي بحب اتكلم مع الناس مع اني مش اجتماعي اوي بس عندي حاجة غريبة مش موضوعنا .

عمنا بيبصلي فروحت مديله طرف الخيط حضرتك بتشبه عليا يا حاج قالي لا بس عايز اسألك انت في علمي ولا ادبي ( ثانوية عامة).فضحكت وقولتلوه يااااه انا فاضلي سنة واتخرج يا حاج فسكت وقالي متزعلش ربنا يوفقك ووصلني ونزلت.

عدى يمكن اسبوع او عشرة ايام لتتجلى الصدفة في اغرب مشاهدها واركب مع عمي الحاج تاني طبعا هو بحكم عمله مش هيفتكرني انما انا عرفته وبدأنا النظرات سبته راح فاتح الكلام هو انت علمي ولا ادبي قولتلوه يا حاج انت مش فاكرني انا اللي فاضلي سنه واخلص تعليم من اسبوع كده  كنت معاك وسألتني نفس السؤال .

سكت وقالي معلش اصلي انا عندي بنتين توأم واحده علمي وواحده ادبي  فكل ما بيركب معايا ولد او بنت في عمرهم بسألهم وانا شايفك في سنهم فسألتك حلفتله اني في كليه و روحت مطلع الكارنيه بتاع الكليه وقولتلوه بص شكلنا هنتقابل كتير فانا عند اي مكتبه وقفني حصورلك الكارنيه علشان تفتكرني الراجل ضحك من قلبه وقالي مانت ممقوت قوي وشكلك ميديش ودردشنا شويه وانا نازل الراجل صعب عليا قولتلوه على فكرة يا حاج انا كنت ادبي .

التعليقات

يجب عليك تسجيل الدخول لتتمكن من إضافة تعليق