هات له شاي على حسابي

A kadry

A kadry

بتاريخ نشرت

الناس الكبيرة دي ناس بركة وهيفضل دمهم خفيف وحيفضلوا مصدر استغراب وتعجب من اي جيل اصغر منهم

من زمان كنت في القهوة وانا كنت بقعد على قهوة كلها ناس في سن المعاش حتى كان ليا اصحاب منهم تخيل كان سني 18 سنة وصاحبي على سبيل المثال لا الحصر عم فاروق (72 سنة ).

وعم فاروق دا بقى قصة كان راجل خياط وكان غريمي اليومي في الطاولة وكان كل يوم يستناني ولو اتاخرت كان يقلق جدا عليا كان لسه الموبيل مفيش .

المهم كان ابويا جايبلي لاب توب وطبعا من الرعيل الاول انما كان جهاز بمقياس ايامه وروحت القهوة ومعايا الجهاز علشان حقابل واحد زميلي مهندس كومبيوتر من المفترض انه حينزلي ويندوز ( واخد بالك حنزل ويندوز )

المهم عم فاروق قالي هو ايه ده قولتلوه كذا قالي فرجني يا واد فتحت وبدأت اشرحله وهو مبهور طبعا كان بالنسبه ليه دا الة الزمن قالي يعني دا من غير كهربا بالبطارية طبعا انا كنت بقرب المعلومة ليه على قد ما اقدر روحت متفزلج ومصوره بكاميرا الاب واول ما شاف نفسه هاج وكبر وقالي كلمه على قد ما كانت ذات معنى على قد ما انا مازلت استخدمها مع كل حاجة جديدة قالي وهو عمال يقارن صورته بنفسه وبيتحقق ان هو اللي متصور دا انا فعلا يا ولاد .... علم الانسان ما لم يعلم .... هاتله شاي على حسابي دا صورني من غير ما يحمض الصورة.

التعليقات

  • A kadry

    طبعا دا تعليق واحد بس انا لو قولت باقي التعليقات من باقي الناس الكبيرة برضه كانت دمار يومها واحد قال برضه مهو دا اللي اسرائيل عملاه علشان تدمر الشباب وردود اعجب من حكايات الف ليله وليله
    2
  • Ms-nona

    "صورني من غير ما يحمض الصورة."
    😂😂😂
    متعة الجلوس مع كبار السن غير المتحلطمين
    3

يجب عليك تسجيل الدخول لتتمكن من إضافة تعليق