ايام ثانوي ( اتسرقنا عالبحر )

A kadry

A kadry

بتاريخ نشرت

وما زلت في ايام الشقاوة .

طبعا قولتلكم على موضوع يوم الثلاثاء اللي كنت مش بروح فيه المدرسة واسبابه . وقولت برضه ان نشاط يوم الثلاثاء كان رياضي بحر او كورة .

انطلقنا كالعادة يوم الثلاثاء ووجهتنا المرة دي البحر طبعا بحكم اسكندريتنا مكانش بيفرق معانا البحر صيف او شتا ضيف برضه دماغ الشباب والتهور .

فطرنا وطبعا قعدنا نخطط حنروح بحر ايه واتفقنا نروح شاطئ ميامي كنا حوالي 8 افراد كله جاهز بشورتات البحر ماعدا 2 روحنا وجهزنا حالنا لعبنا كورة على الرملة وجسمنا سخن ونزلنا الميه هزار واستمتاع وطبعا منافسات مين حيعوم لحد فين والوقت بيجري ومش حاسين قررنا نطلع لقينا واحد صاحبنا مش موجود والتاني بيقول انه مشي وراح يوصله لحد المواصلات. طيب الفوطة اوبس مش موجودة يلا الهدوم كمان مش موجودة .

ايوه اتسرقنا يا رجالة طبعا كان بينا واحد صاحبنا والده كان في فرنسا فكان لبسه في منتهى الشياكة كل دا اتسرق .وطبعا لمعرفتنا بصاحبينا فمجاش في بالنا ثانية نشك فيهم انما كنت مفكر انهم عاملين فينا مقلب.

بتمر الوقت والسقعة واخدة حدها مننا طيب مش مهم اتسرقنا وارد طيب حنروح ازاي بشورتاتنا دي وحنقول لاهلينا ايه كان عندنا حصة سباحة .

وطبعا من المواقف المتعثرة بتتولد النكتة وقعدنا نتريق على بعض بس بحذر واكتر واحد اتريقنا عليه زميلنا اللي بباه في فرنسا اصل كان لابس اسبيدو .

وطبعا الصحاب بتبان في الشدة واحد مننا كان عندهم شقة كمصيف في نفس المنطقة وكان معاه مفتاح الشقة وصلنا هناك ربنا يستره سترنا كل واحد واللي لقاه طبعا اللي لبس تي شيرت حريمي واللي لبس جلبية بباه وكانت المصيبة في الشباشب فرجع اكتر من نصنا حافي القدمين وكل واحد يبص للتاني ونفسه يضحك بس مصيبة البيت الللي مستنياه مخليه الضحكة ملهاش طعم .

طبعا غير ما حتدخل المنطقة بتاعة بيتكم والصحاب بتوع الحي والجيران مش حنخلص من كلامهم ايه اللي انت لابسه ده وحصل ايه وفين هدومك.

انا كنت لابس شورت ولقيت في شقة زميلنا روب حريمي كنت لابسه واكيد مكنش لسه في موبيلات ولو كان فيه مكنش هيكون بكاميرا لتوثيق تلك الواقعة .

كل اللي فات كوم واللي قاله صاحبنا اللي سلفنا الهدوم كوم تاني يا شباب بكرة الهدوم تكون عندي مش عايز مشاكل احسن ابويا يفكر الشقة اتسرقت .

وطبعا تاني يوم كان نص اولياء امور صحابنا في المدرسة واترنيننا علقة محترمة في المدرسة علشان نتربى ودا كان ليه اثر اننا نفقد ميزة يوم الثلاثاء لمدة تصل الى 3 اسابيع بدون نشاط رياضي .

التعليقات

يجب عليك تسجيل الدخول لتتمكن من إضافة تعليق