ذكريات راس السنة

A kadry

A kadry

بتاريخ نشرت

بعد فترة من الهم والقرف نرجع تاني للحكايات الشقية .

بما اننا في احتفالات رأس السنة فلازم نتكلم عن احتفالاتنا احنا كطلبة وقت راس السنة ايوه اللي جه في بالك صح .

طيب باختصار ححاول ارسم المشهد على ما اتذكره كنا حوالي 7 افراد كنا في ثانوي وطبعا للدماغ المخلل مينفعش نفوت راس السنة وقعدات راس السنة جبنا ما لذ وطاب من الميه واكيد فاهمين يعني ايه ميه .وطبعا نظرا لظروف البلد في اليومين دول معرفناش نجيب دخان ( كنا طلبة خلي بالك ).

طيب حنروح فين لسه محددناش واحد اتطوع وقال عندي في شقة العجمي طيب ازاي اترسم الموضوع متفهمش المهم يوم 31 سبع عيال شيلين كيستين سود وراكبين المواصلات المتوجهه للعجمي صاحبنا المتطوع بالمكان معاه مفتاح الشقة واحنا كلنا امل على قضاء ليلة من ليالي الجاهلية .

نزلنا في الطريق ها يا عم فين شقتكم لنفاجأ انه ميعرفش مكانها هو راحها مرتين او تلاته بس هو قال متقلقوش حفتكر المكان .

طبعا لم يخلو جو البحث عن الشقة من الافيهات والنكت كان صاحب الشقة يقول ابوبا كان بيمشي هنا لا هنا واحنا نقوله ابوك بيمشي ازاي .

بعد ساعتين يا سادة وصلنا الشقة .طيب مركز بقى حضرتك لنفاجأ ان الشقة لسه غير مؤسسة وكلها شكاير اسمنت وبدون اضاءة ويدوبك حنفية ميه متفهموش تعب ولا كسل قررنا نقعد في الشقة على حالتها احنا جايين ننبسط ونحتفل ومفيش حاجة حتعكنن علينا حتى لو شقة عالطوب .

طبعا وقتها كان كشافات الشحن رفاهية والموبيلات لم تتوجد بعد فقررت مع واحد صاحبي متطوعين ننزل نجيب شمع .

الساعه حوالي 11 والمنطقة كانت جديدة فمش بسهولة حتلاقي محلات قررنا نرسم خريطة علشان نعرف نرجع للشقة تاني .

بعبقريتي لمحت راجل وست ماشين فقررت اسألهم عن محل بيبيع شمع لتتجلى الكارثة ويطلعوا والد ووالدة اخينا صاحب الشقة .

اضحك اضحك حاسك بتضحك عليا فعلا بس ساعة القدر يعمى البصر مكنتش قادر مثلا استوضحهم من بعيد مع معرفتي التامة بيهم انما تقول ايه النصيب طبعا زي ما روحنا الشقة 7 رجعنا 6 صاحبنا اتفضح واحنا كمان اتسيحلنا احلى سياح بس انا الوحيد المرزق فيهم ولا عرفوا يوصلوا لابويا ولا امي كانوا مسافرين مقلوش الا لاختي الله يرحمها .

كل دا كوم واللي حقولوه دلوقتي كوم تاني ابو صاحبنا بتاع الشقة اثناء جولته الكريمة في المنطقة العربية بيسيح لاهلينا راح لابو واحد تاني قاله العيال جايبين و كانوا حيشربوا ليفاجأ بابو زميلنا بيقولوه وايه المشكلة مهم شباب ولازم يجربوا انا عن نفسي كنت بشرب وانا في سنهم ليقرر ابو صاحب الشقة يمشي ليجيلوا جلطة .

التعليقات

يجب عليك تسجيل الدخول لتتمكن من إضافة تعليق