فاصل اعلاني

A kadry

A kadry

بتاريخ نشرت

الاجيال من 78 الى 82 عارفة اللي حتكلم فيه .

زمان كنا بنستنى شهر رمضان علشان نتفرج على الاعلانات تخيلوا دي حقيقة كنا بنتمنى المسلسل يخلص او الفوازير علشان نستمتع بالاعلانات اعلانات كتير كنا بنتبارى في حفظها حتى اننا كنا بنشتاق ليها .

نفتكر على سبيل المثال ولا الحصر في الصدارة اعلانات طارق نور ومين منا ميفتكرش اعلانات حلواني الصمدي ولا جهينة اعلانات فيليت العسكري والهدى مصر وغيرهم بس دول اللي في دماغي حاليا .

كانت الاعلان هادف وليه قصة واغنيته منفصلة تدخل قلبك دا غير طبعا ان المنتجات مكانش فيها زحمة والمعروض كان قليل بس واقعي وهادف وبيخدم .

حاليا مش حزايد ولا حتكلم على اعلانات اليومين دول ولا حسف حتى بس واحدة واحدة ولو فيكم حد بيفهم او ليه علاقة بالتسويق حيعرف انا اقصد ايه . ايه الحكمة اني اعمل اعلان عن جبنه ينهار ابيض  الجبنه من اركان التلاجة بيضاء ولا تركي ولا عباسي لازم يكون فيه جبنه . لا وتبص بقى على اعلانات الجبنه اللي وصلت انها تبقى راعي للدوري وراعي لبرنامج اتفه من اللي فكر في انه يعمل اعلان للجبنه ثم اعلان عبور لاند اللي بيقول الطعم الاصلي بيناديك وان الشركات التانية اتعلمت من عبور لاند انا عندي 39 سنة والله مكنش فيه جبنه عبور لاند زمان .

زمان كان في اعلانات عبد الرحيم عمرو للاثاث اللي احتل مكانها اعلانات بداية من تميمة الى الكنبة اللي بتنفرد سرير .

من الاعلانات المستفزة برضه اعلان صيانة زانوسي يا جدعان والله انا لو رايح اشتري غسالة مش حعبر اي غسالة بتبدأ بحرف ال زال مش ممكن واللي يجنك فين الشركة المصنعة نفسها حاجة بتاعة بتعرف تعد لحد كام هما الوكالة الاصلية لصيانة زانوسي.

وكله كوم واعلانات سينا كولا كوم تاني كرهوني في سينا شمال بجنوب وكرهت المدرسة والعيال واي حاجة بيطلعوها في الاعلان .

في اعلانات اقسم بالله لو صوروها في بيتي في الصالة علشان اشتري منتجاتهم انا مش حشتريها 

وخليني مختمش ونتكلم على الاعلانات تاني بكرة .لو عشنا 

التعليقات

يجب عليك تسجيل الدخول لتتمكن من إضافة تعليق