يومي السادس ( اقف على الكرسي )

A kadry

A kadry

بتاريخ نشرت

الجيل اللي في سني يعرف يعني ايه لما نركب مواصلات عامة لازم نقف لحد كبير ونقعده ابويا شخصيا علمني كده ابني كان معايا وابني سنه 8 سنوات وركبنا الباص ودفعت له وقومته لما ست كبيره جت تقف جنبنا فلما قعدتها وعرفت اني دافع له حلفت تردلي ثمن تذكرته بحجة انه دافع تذكره وطبعا رفضت وقولتلها انتوا يا حاجة ربتونا على كده حتحاسبونا على ربايتكم لينا وابني فهم انا عايز اعلمه ايه والحمد لله . 

انا عارف مش دي الحكايه الحكايه يا عزيزي نفس الموقف من سنين كنت في الكلية وراكب المواصلات وفجأة ركب شخص كبير وباين عليه انه مش قادر يتحرك بمعنى الكلمة وكان في شباب قاعد قدام في بداية الباص ان حد يخلي عنده دم انسى القصد استنيت سيكا كده ان حد من الجيل الاقدم او الاحدث يتحرك وابدا روحت قمت وبنرفزة اتفضل يا حاج الراجل صعبت عليه نفسه وصمم يقولي لا يا ابني انا نازل قريب روحت مصمم انا كمان اتفضل ريح لحد ما تنزل قالي انا مرتاح كده وكانت في نبره صوته عتاب للشباب الصغير اللي كان بيراقب الموقف ونفسه يخلص من الاحراج اللي حطيتهم فيه وبدأت ناس تقوم من الرجال اللي اكبر مني سن اتفضل والراجل يقول ابدا انا مرتاح كده كبرت في دماغي قولتلوه مش عايز تقعد ليه قالي انا مرتاح وانا واقف روحت بمنتهى العصبيه قولتلوه طيب تعالى اقف على الكرسي الراجل ضحك وانا انتبهت وضحكت على اللي بقوله والناس كلها ما بين ضحك ودعاء والحمد لله اقنعته يقعد .

القصد الحاجات دي بتفرق جدا وصدقني لو لف بحضرتك الزمن واضطريت تركب مواصلات وكنت كبير ولقيت شاب او شابه قاعدين وسماعات الهاند فري  في ودانهم مغيباهم عن الواقع حتتمنى ان حضرتك كنت في شبابك كنت تقف لحد علشان تلاقي اللي يقف لحضرتك .

شكرا ....

التعليقات

يجب عليك تسجيل الدخول لتتمكن من إضافة تعليق