يومي يايومي!

علي كيكي

علي كيكي

بتاريخ نشرت

بي.اس: هالمرة هالحكي من راسي لراس @yawmme    عكس كل المرات الي قبل وكنت راعي فيها انو في ناس عم تقراً ..
بي.اس2: بعرف انو الـ P.S هي شي بكون باخر الحكي بس وجب التنويه هالمرة مسبقاً
عزيزي يومي ...
بعرف انك جماد وانو انت عبارة عن مجموعة كودات وعم تشوف حكيي عبارة عن مجموعة حروف بفونت (Montserrat) اتعبت ضمن هالصندوق المعمول برمجياً ليعرض النصوص الي بكتبوها الناس، بس مع هيك متاكد انك حتكون فهمان هالحكي اكتر بكتير من بشريين عندهم بطيخة مازوت بين كتافهم   
المهم ياابو اليوم ( متل ابو عليش وابوحميد وهالشغلات الي بشر بستخدموها بين بعضهم ) ياسيدي انا من اول مرة استخدمتك حبيتك وحبيت الفكرة تبعتك وكيف عم تكون مكان مناسب وجديد وحلو وفي جو بساعد على انو واحد يتشجع ويكتب شو عم يصير معو يومياً، بس متل ماشفتني انت باخر فترة بعدت عنك شوي وبطلت شارك شي هون وهالشي نتيجة انو مضغوط بشغل و3 مليون قصة مخليني يادوب اقدر اعمل واجباتي الاساسية لهيك ماتزعل ياعزيزي واتاكد انو مو نسيانك !
مهم خيو ليك شو انا جايك بمصلحة والي هي انو بدي استغلك واحكي عن كم شغلة وانت مجبور تسمعني وماترد علي بشي مشان ماازعل منك   
هاد ياسيدي انا باخر فترة كتير  شغلات بلشت فيا بحياتي ونتيجة الها صرت حدا استغل وقتي كتير وبحكم اني عربي وعايش بمجتمع عربي مابحترم خصوصية الوقت والشغل و و و و.. اضطريت صير انسحب تكتيكياً وخفف مع كل شخص بشوفو مانو مفيد لشغلي او حياتي وبالتالي كتير اشخاص صارو يفكروني ( نفسية - اشتغل وشاف حالو علينا - حيوان - ^%& ومن هالشغلات الي بحبها قلبك )
فقلت بحكم اني بعدت فترة عن كتير ناس انو مو غلط شوف شو وجتهم نظرهم فيني صارت وكيف تاثر الجو المحيط فيني نتيجة هالشي وقلت لروح اعمل حساب ع موقع صراحة وحط راسي بين هالروس وقول ياقطاع الروس وتوقعت كتير منيح الكلام الي راح يجيني والمسبات ووووو بس شي الي ماكنت متوقعو انو وخلال اقل من 12 ساعة يجيني اكتر من 25 مسج سيئ بكل ماتعنيه كلمة سيئ وكلهم ملياني حقد وكره وكتير شغلات بتقرف ومشكلة كلهم مكتوبين بطريقة وستايل ناس بعرفهم وكنت رفقة كتير قوية معهم لدرجة انو حافظ طريقة كتابتهم والاحرف كيف برتبوها بالتشات !

هلئ اكيد انا موجايك لقلك هالشي وتعطيني حل لانو متل ماحكيتلك فوق بعرف انك جماد وماحترد علي .. بس جاي احكي قدامك لانو لازمني شوي فرغ من هالطاقة السلبية قدام شي حدا وبحكم انو مابدي مواعض ونصائح تبع طنش والشجرة مثمرة بضربها الكل بحجر ووو قلت مافي غيرك زلمة تفهم وتسمع ومابترد بطريقة معسولة وتبع رفع معنويات وهالقصص لانو انا اصلا ياشريك مو فارق معي كل هالحكي واصلا تارك الاكاونت شغل وبدي ضل تاركو ليخلص هالحكي واستمتع بمدى الكره الي محيط فيني   
بس عندي طلب صغير ياابو اليوم وهو خليك هيك زلمة فهمان وعم تسمع الكل وماترد لانو قلة الرد هي رد ومرات بتكون اقوى من كتير كلمات   

يسلمو شريك انك تحملتني <3 

التعليقات

  • عدنان الحاج علي

    اتمنى لك التوفيق
    0
  • زمردة

    استمتعت بقراءة اليومية باللهجة الشامية، مع انني لست جيدة في تقليد اللهجات 😊
    لست في موضع تفلسف، ولست حكيمة زماني لأقول كلامًا صحيحًا، لكن يمكن ان تعتبر ما سأقول اشياء تحتاج لتذكرها حتى تحكم بشكل افضل على الوضع..

    حسب علم النفس، تتغير اراء واحكام الشخص بحسب تجاربهم، استطيع تعداد ألف سبب يدفع الاشخاص لكتابة شيء سلبي عنك، وخمن ماذا؟! لا يوجد سبب واحد منها يمسّك أو يضع اللوم عليك.. ✋
    تمر بنا اوقات نشعر بكل ما هو سلبي تجاه عائلتنا، الذين هم اقرب الناس، ومن الصعب أن يفعلوا شيئًا بقصد الأذية، فما بالك بالاشخاص الغرباء، حتى لو تعاملنا معهم 10 سنوات، فرابطة العائلة اقوى، ولكنها لم تسلم من هذه الامور..
    ودعني اضيف شيئًا اخيرًا مملًا🙃، احيانًا المشكلات في العلاقات يكون لها نفع اكثر من الضرر، فربما تفلتر لك الاشخاص، او ربما تتغلبان على المشكلة وتصبح العلاقة بينكم اقوى.. 👌
    بالتوفيق لما يحبه الله ويرضاه
    0
  • يوسف

    يجب ان اركز لأفهم اللهجة المصرية تبا
    1

يجب عليك تسجيل الدخول لتتمكن من إضافة تعليق