هايكنغ!

هايكنغ!

علي كيكي

علي كيكي

سعادة يشعر بالسعادة، بتاريخ نشرت

اليوم الجمعة 15/9 .. هاد اليوم الي ناطرو من اول الشهر تقريبا   
لانو واخيراً راح قدرت اطلع رحلة غير فيها شوية جو وابعد عن كل اشكال الضغط والشغل والناس النقاقين والي موجودين كل يوم بحياتي والسوشال ميديا اهم شي!
بلش يومي الساعة  6 الصبح كتير بكير بالنسبة لشخص نايم عالساعة 3.30 بعد ماخلص شغلو وسلمو وريح ضميرو المهني   
فقت استوعبت العالم لمدة ربع ساعة متل عادتي اليومية وبعدها قمت حضرت الكورن فلكس تبعي وسندويشة التيركي وكاسة الاميركان كوفي وبعدهم اخدت دوش منشط وسريع وسشورت شعراتي واتاكدت انو كل غراضي مضبوبين بالشنته وجوازي وهويتي وموبايلي وشاحني وسماعتي معي وكل الامور تمام..
طلعت من البيت تمشيت بالحارة الصغيرة وطلعت الدرج الطويل لوصل للشارع الرئيسي واول ماوصلتو وباعلى صوت " تكسي" كانت هي لاول مرة بحياتي بصرخ ع تكسي بالعادة باشر وبس! بس كونو هالمرة متحمس ومستعجل لاهرب لبعيدددددددد كتير طلعت مع هيك   
وصلت نقطة التجمع وبلشت دور بعيوني عالناس وعالباص لاتاكد فعلياً انو انا راح اطلع هالرحلة الجميلة..
عال9.30 بلشنا نركب بالباص وعال 10 مشي فينا وقطعنا اول 15 كم بسلام وهدوء وفجاًة وقفتنا دورية شرطة من الي بكونو عالطرق الخارجية واكتشفت انو الباص تبعنا عليها حجز ومخالفة قد راس الشوفير واضطرو المنظمين يأخرونا شوي ليجي باص تاني وهي كانت اول ضرب بصير معنا ..
اجا الباص التاني بعد تقريبا 45 دقيقة ورجعنا نكمل طريقنا باتجاه وادي رام الي كان ضل في 320 كم لنوصلو!
بعد اقل من ساعة ومسافة 70 كم تقريبا وقفتنا دورية تانية وهالمرة دورية هي لقت انو منظم رحلة تبعنا مطلوب للمحكمة مشان يشهد ع قضية ولازم يرجع ع عمان   وهيك اخدو معهم وتركونا نكمل بطريقنا بسلام! بس بعد ماانسم بدنا لانو هو اصلا رفيق وحدا كلنا بنعرفو بشكل شخصي اصلاً ..
مشينا وماطلولنا هالمرة لنرجع نوقف لانو انفجر دولاب الباص ولازم نغيرو وصار هالشي بالزبط بعد مامرقنا من عند لوحة الطريق الي مكتوب عليه وادي رام 195 كم! غيرنا الدولاب واجت دورية شرطة تساعدنا وتطمن انو مافي حدا في شي ومشينا بسلام وهالمرة كنا كلنا امل انو راح نكمل طريقنا بسلام ونوصل لبر الامان بدون اي مشاكل ..
بس بعد شي 100 كم راح هالامل مع الرياح صحراوية وتبعثر مع انفجار الدولاب التاني وهالمرة كلنا متنا خوف انو مايكون في سبير!
بس طلع الشوفير شاطر ومعو كمان سبير وطلع حظنا شوي احلى ووقفتنا كانت جنب استراحة استغلينا وقت تغير الدولاب بانو ناكل بسكوت او الي بدو يفوت حمام او يصلي مهم نستفاد شوي من هالوقت ..
ركبنا هالباص وكنا كلنا متفائلين انو هالرحلة مصيرها نام بالشارع او بشي مشفى   
الساعة 6 بالزبط وصلنا لوادي رام وكان هاد انجاز حقيقي نحظى في بهاليوم وكلنا نكون مبسوطين في بطريقة بتضحك ونفس وقت بتفرح .. اي بتفرح ليش مابعرف بس كان شعور بالسعادة طول الوقت وانا الحدا الي بنق كتير وبدايق بسرعة مازعلت كيف مابعرف ..
وركبنا البيك اب ( الي بالصورة )  وبلشنا نفتل بالصحراء ونروح باتجاه المخيم تبعنا وهيك بلش يومنا يصير حلو وتبلش الاجازة عنجد   

التعليقات

  • SooMaa

    هههههه الله اعلم ايش كنت عامل لما علقتوا بكل هذه المشاكل بهذه الرحله المشؤومهO(≧∇≦)O
    المهم كان يوم حلو ، وان شاء الله كل ايامك تكون بحلاوة هاليوم.
    0
    • علي كيكي

      ههههههههههع لك والله انا بالعادة الرحلة بكون موفقة فيها ووشي خير =D
      بس هالمرة شكلو كان في شي حدا منحوس طالع بالرحلة
      وايامك ان شاء الله كلها سعادة
      0

يجب عليك تسجيل الدخول لتتمكن من إضافة تعليق