هالسبت غير!

هالسبت غير!

علي كيكي

علي كيكي

استمتاع يشعر بالاستمتاع، بتاريخ نشرت

عطول يوم السبت بحياتي بكون يوم ممل وكئيب ومليان شغلات روتينية وفعلياً بحسو يوم مالو اي داعي   
هالسبت كان غير.. كان احلى، ممتع اكتر، مجنون اكتر واسرع اكتر من اي سبت تاني مرق بحياتي!
كان اليوم تاني من رحلة الهايكينغ الي بلشتا مبارح وبتلاقو تفاصيلها هون!
مهم هاليوم بلش ساعة 4.30 الصبح ( مع انو انا مانمت لانو انا شخص مابحب ينام الا بتختو!) لفيت عالمجموعة كلها فيقتهم مشان نطلع مسير لجبل قريب عالمخيم ونشوف شروق الشمس وعال5 بالزبط بلشنا المسير ورحنا باتجاه الجبل الي طلع بعيد اكتر مما كنا متوقعين   وعالطريق بلشت المجموعة تنهار واحد ورا واحد وبالاخير اكتشفنا انو صرنا 3 مجموعات
وحدة مجموعة الكسلانين وهنن الي بالبدايات انهارو ورجعو عالمخيم وكملو النومة والتانية وهي كانت هي مجموعة الي مالحقت التالتة بس ماانهارو لهيك فضلنا انو نقعد بمحل يبين في شروق الشمس ومانضيع .. اما المجموعة الثالثة فكانو هنن الاسرع والي اختفو تحت خيوط الليل الاخيرة بسرعة بدون ماينتبهو علينا   وهدول هنن الوحيدين الي وصلو للجبل وقعدو على قمتو وتفرجو ع شروق الشمس منو..
بعد الشروق كان في رحلة العودة للمخيم والفطور وبعدها تجهيز لمغادرة المخيم ونبلش رحلة لمدة ساعتين بنص الصحراء بمكانات اقل مايقال عنها انو رائعة وفوق الخيال ..
كتير اشخاص بس يسمعو عن الصحراء بتخيلوها مكان فارغ مافي شي غير الرمل وشوية جمال والكثير الكثير من الحشرات والمخلوقات المخيفة! وبفكرو انو اذا راحو عليها ماراح ينبسطو بالمرة   
اما الحقيقة هي العكس الصحراء اكثر محل فيك تختلي في مع نفسك وترتاح من عجقة الحياة في وتبعد عن كلشي بسببلك التوتر فيها طبيعة غريبة وجميلة بنفس الوقت طبيعة مو متعودين عليها بحياتنا اليومية فيها كتير اشكال للحياة والسعادة والانبساط   

التعليقات

يجب عليك تسجيل الدخول لتتمكن من إضافة تعليق