تعمل ايه لما تلاقي اللي قدامك مش فاهمك ؟؟

تعمل ايه لما تلاقي اللي قدامك مش فاهمك ؟؟

Mosaab Fathy

Mosaab Fathy

بتاريخ نشرت

شوية نصائح لما تلاقي اللي قدامك مش فاهمك | أو اللي حواليك مش فاهمينك :

———————————————–

أكتر حاجه ممكن تعاني منها نفسياً وتسبب لك تعب نفسي غير عادي ان اللي قدامك مش فاهمك صح او اللي حواليك يكونوا مش فاهمينك ، شعور اتوقع ان الأغلبية مروا بيه ، الشعور ده بيعود عليك بكم هائل من التعب النفسي ويعتبر خطر مباشر على صحتك النفسية ، بيخليك مخنوق جداً ، بيقلل من ثقتك بنفسك في الأغلب ، لما اللي قدامك لايفهم قصدك ومش عايز يفهم غير جزء من كلامك او بيحاسبك على كلمة في السطر اللي قلته وساب العبارة المكتملة ، الأصعب من ده كله لما يكون الشعور ده من ناس قريبه جدا منك فتتعب اكتر وتحس بالخنقه اكتر وتبقى مش مستوعب ، هو لما انت/انتي مش فاهمني امال مين اللي حيفهمني !!

حاول تعمل الحاجات دي يمكن تساعدك في تقليل تعرضك لهذه المشاعر :

1- استوعب في البداية ان عدم تركيز الناس أصبح ظاهره كونيه ، الناس مش مركزه في حاجات كتير وأولها الكلام اللي بيسمعوه من بعضهم البعض ، أدمغة الناس بقت بتاخد اول كلمتين في كلامك وتجري بعدها ، الناس مش متعوده تركز وتقريباً كده زهقانه انها تركز ، آه وربنا ، مش متعوده تسمع وتنصت ، الناس اغلبهم مش عايز يستوعب ويهضم الكلام في عقله حبتين وده لو انت مش مستعد بانك تشرح كويس وبوضوح حتتفرم في مفرمة عدم تركيز الناس واللي حواليك وسرعان ما حيفهموا اللي هم عاوزين يفهموه وحتلبس في الحيط ، ركز جدا انت معاهم انهم يفهموك ويستوعبوا كلامك .

2- اتعامل بمبدأ ان كل من حولك أغبياء ، لا يسمعون واذا سمعوا لا يفهمون واذا فهموا لا يستوعبون واذا استوعبوا يستوعبوا اللي على مزاجهم ، هذا سيحفزك ويدفعك الى الحرص على توضيح مقاصدك وما تريد ايصاله دون ان يتم تجزئته او تحريفه لتتجرع بعدها مرارة الظلم انك لم تكن تقصد ذلك ، اعمل كل شئ تقدر عليه قبل ما تتفهم غلط لانك لما بتتفهم غلط بيكون الجهد أكبر علشان تغير تفكير اللي قدامك واللي فهمه .

3- اعتاد هذه الكلمات في حديثك من هنا وصاعداً لتجذب مسامع من أمامك لمقاصد حديثك :

“أنا أقصد تحديداً ان اقول …

“أريد بوضوح ان اقول ….

“وحتى لا يفهم مقصدي بالخطأ اريد ان اقول …

“الهدف من حديثي هو ….

” أرجو ان يكون حديثي واضح لكم وهو اريد ان اقول …

” باختصار شديد اريد ان اقول …

” بذكر مرة تانيه اني عايز أوصل من كلامي لـ…..

” انت/انتي وصل اليك ما اريد ان اقوله ؟؟ حديثي مفهوم ؟؟

4- أحياناً انت نفسك تقع في مشكلة الرغي والهري الكتير دون ان تدرك ذلك عن نفسك فينسي كلامك بعضه البعض ويتشتت الهدف لدى من امامك ماذا تريد ان تقول بالضبط ، درب نفسك على ان تكون مختصراً في حديثك ، لم يعد الناس لديهم طاقة الان للاستماع لفترات طويله تزيد عن دقيقة لأن بعدها لا يسمعون تقريباً ، البدايات لدى الناس هي أهم وأقوى من كل ما بعدها من حديث ، اذا أفلحت في ايصال هدفك ومقصدك في أول 30 ثانيه فأنت بطل لان كل ما بعد ذلك لن يغير كثيرا ما فهمه من أمامك ، خلاص الهدف وصل واللي جاي بعد كده شرح وتوضيح واثباتات وامثله وبراهين ، اعطي كل جهدك في هذه الثواني الأولى لان بعدها يقل تركيز من امامك ثم يتلاشى تقريباً .

5- اذا كنت لا تتمتع بالذكاء الكافي لإختيار الوقت المناسب والمكان المناسب والموقف المناسب لحديثك فلا تلوم الا نفسك ، قليل من الذكاء الاجتماعي مطلوب ليصل حديثك بشكل جيد لمن امامك ، اختار الوقت المناسب والمكان المناسب لايصال حديثك .

6- توقف فوراً عن الحديث أمام الأصوات العالية ، أمام الغاضبون ، أمام الثرثار ، أمام زوجتك لو شدت الأجزاء وداست على زرار لسانها ، امام المجموعه اذا فيها اكثر من شخص يتحدث ، توقف فوراً ولبرهة من الوقت تجبر من أمامك ان يسمعك ، توقف لفترة ليهدأ من أمامك ليستمع ، توقف فترة ليبرز صوتك ويكون واضحاً ، توقف بالقدر الكافي ليعلم من امامك انك لن تتحدث الا اذا سمعك .

7- اذا ضاع هدفك ومقصدك بين سيل الاتهامات وأمواج الحديث المندفعة لمن امامك فخذها قاعده ، ركز ثم ركز ثم ركز وجاهد من اجل اعادة دفة الحديث لمقصدك الصحيح ، لا تنجر لمستنقع الدفاع عن نفسك ، لا تبحر بعيداً عن هدفك دون وعي ، لا تسير خلف الاتهامات فيضيع كل شئ فلا تصل لأي شئ سوى البحث عن اثبات طهارة قلبك وصفاء نيتك ، قل له او لها : سأعيد حديثي بشكل أوضح ، قل له يبدو انني لم افلح في ايصال ما اريده حسنا سأقول ذلك بشكل آخر ، قل له ما تريد ايصاله وفقط ولا تفكر فيما يقوله لان اي شئ سيقوله قطعاً سيكون مخالفاً لما أردت ان تقوله .

8- اذا عجزت فانسحب فكل التجارب اثبتت ان الاستمرار خسائره فادحه ، اقبل الهزيمة وتعلم منها ألا تقع فيها مرة أخرى ، لا عليك بمشاعر الكرامة وعزة النفس وانك ستظهر بمظهر الضعيف ، انسحب ولا تبالي ، انسحب ولا تجادل لقد هُزمت فتقبل ذلك ولتجعل المرات القادمة خالية من الأخطاء .

9- للعلم كل ما سبق وقرأته لا يمنع احتمالية بنسبة 99.99٪ انك انت ايضاً لا تسمع بشكل جيد لمن حولك ، ولا تركز في حديثهم وغالبا تكتفي بعد اول 30 ثانيه من حديث من امامك وده يخليك تعكس كل النصائح هذه وتسقطها على نفسك كمستمع لمن حولك ، ستتجلى لك مقاصد كثيره اذا ركزت في أحاديث الناس ، ولا تتعجب اذا وجدت الكثيرين محصلة حديثهم = صفر ، هذا للاسف حتقابل كتير بيدور في حلقة مفرغه ولا يوجد شئ حتطلع بيه في النهاية من كلامه ، عادي حتتعود .

10 – اقرأ شويتين عن موضوع انماط الناس حيساعدك جدا ، ازاي تتعامل مع الشخصية البصريه وازاي تعرفها وايه افضل اسلوب في التعامل معها ، ازاي تتكلم مع الشخص الحسّي ، ازاي تقنعه بكلامك ، ايه افضل اسلوب تتكلم بيه مع الشخصية السمعية ، ياترى متى اتكلم كتير مع السمعي ولا البصري ولا الحسي ، ومتي يكون كلامي مختصر جدا مع السمعي ولا البصري ولا الحسي؟؟ خدلك فكره عن الموضوع ده حيعجبك وحيساعدك في امتلاك مفاتيح التعامل مع كثير من الناس ، بلاش تتعامل عمياني بطريقه واحده وثابته مع كل الناس ده مش صح ابداً أصابع اليد الواحده ليست مثل بعضها فهل ستكون طريقتك الواحده مناسبة للجميع بالتأكيد لا ..

دمتم بخير ..

التعليقات

يجب عليك تسجيل الدخول لتتمكن من إضافة تعليق